Leikur tveggja hálfleika!
08.08.2023
Breiðablik
INTERNET (10)
- Leikur tveggja hálfleika!
- KSÍ: leikskýrsla
- Myndaveisla úr fyrri hálfleik
- Mörkin úr leiknum
- Krefst sigurs á heimavelli
- Breiðablik á toppinn
- Umfjöllun og viðtöl: Breiðablik - Þór/KA 4-2 | Blikar skutu sér á toppinn
- „Mjög ólíklegt að hún verði með í bikarúrslitaleiknum“
- .Net: Skýrslan
- ÁSMUNDUR: ÞAÐ FÓR ILLA Í MIG!
Það voru frábærar aðstæður til að spila fótbolta á frídegi verslunarmanna og flest eins og best verður á kosið – reyndar fyrir utan mætinguna á völlinn, hún var satt best að segja frekar léleg! Mögulega spilar verslunarmannahelgin stóra rullu þar, en við þurfum að gera betur sérstaklega núna þegar við erum með lið sem er í harðri baráttu við Val um efsta sætið í deildinn og komið í bikarúrslit.
Byrjunarlið Blika var svon skipað:
Það eru augljós sannindi að fótbolti er leikur tveggja hálfleika, en stundum á það meira við en venjulega og þannig var það í dag þegar Blikastúlkur tóku á móti norðanstúlkum í Þór/KA. Þór/KA er virkilega hættulegur andstæðingur eins og Blikar hafa fengið að finna fyrir tvisvar á þessu ári. Þær eru mjög þéttar, vel skipulagðar til baka og eru virkilega „clinical“ í sínum skyndisóknum. Það er því mjög mikilvægt að kæfa allar skyndisóknir frá þeim í fæðingu og dekka þeirra fremstu menn vel.
Fyrri hálfleikurinn fór svo sem ágætlega af stað og Blikar komust í ágætar stöður, en engu að síður lentum við undir eftir 12 mínútur og uppskriftin sú sama og oft áður. Hulda Ósk braust upp hægri vænginn og sendi boltann á fjærstöng þar sem Sandra María afgreiddi boltann snyrtilega í netið. Fram að þessu voru Blikar mikið meira með boltann en tempóið í sóknarleik Blika var of hægt og því áttu norðanstúlkur frekar auðvelt með að verjast sóknartilburðum Blika og varnarfærslurnar þeirra voru því of þægilegar, líkt og gerðist í fyrri leik liðanna fyrir norðan. Og þannig gekk raunar allur fyrri hálfleikurinn fyrir sig, Blikar miklu meira með boltann og komust í ágætar stöður á síðasta þriðjungi vallarins, en gekk illa að skapa sér opin og góð marktækifæri. Þór/KA leiddi því í hálfleik 1-0 og heilmikið verk að vinna fyrir Blika að snúa þessu við því undanfarnir tveir leikir gegn Þór/KA höfðu þróast með mjög svipuðum hætti og endað illa!
Tvær breytingar voru gerðar í hálfleik, Birta og Írena komu inn fyrir Áslaugu Mundu og Beggu Sól.
Leikhléið var greinilega vel nýtt og Blikaliðið mætti ákveðnara til leiks í seinni hálfleik og byrjaði strax að þjarma að Þór/KA og skapa sér góðar stöður. Það bar árangur á 62 mínútu þegar vel útfærð sókn Blikaði endaði með flottu skallamarki Linli Tu eftir frábæra fyrirgjöf Hafrúnar, sem hafði komið inn á fyrir Ástu fyrirliða 10 mínútum áður.
Áfram þyngdist sókn Blika og á 71 mínútu skoraði Linli Tu aftur eftir að Andrea hafði komið sér af miklu harðfylgi í boltann á endalínunni og lagt hann snyrtilega fyrir Linli sem kom boltanum í netið. Aftur kom varamaður virkilega sterkt inn í leikinn því Andrea kom inná nokkrum mínútum fyrr. Það má aldrei slaka á klónni gegn Þór/KA og augnabliks einbeitingarleysi kostaði okkur mark á 79 mínútu, keimlíkt fyrra markinu þeirra og staðan aftur orðin jöfn – virkilega svekkjandi eftir vinnuna sem hafði verið lögð í að jafna leikinn og komast yfir.
Blikar lögðu þó ekki árar í bát og svöruðu fyrir þetta 5 mínútum síðar með öðru skallamarki og nú var það Katrín sem skorað eftir hornspyrnu frá Öglu Maríu.
Birta innsiglaði síðan sigurinn með frábæru marki undir lok leiksins og 4-2 sigur Blika því staðreynd. Undir lok leiksins kom síðan Ása inn fyrir Katrínu.
Niðurstaða leiksins því sterkur sigur og fjögur mörk í seinni hálfleik gegn sterku liði Þórs/KA – niðurstaða sem gefur góð fyrirheit fyrir bikarúrslitin á föstudaginn kemur.
Kristján Halldórsson