Eigum við að ræða Breiðablik?
Íslandsmeistarar 18 sinnum. Bikarmeistarar 12 sinnum.
Eigum við að ræða landsliðið?
Úrslitakeppni Evrópukeppninnar 2009 og 2013 og 2017.
Eigum við að ræða bikarúrslitin 2021?
Breiðablik-Þróttur, Laugardalsvöllur, föstudagur 1. október kl. 19:15
Skína ljósin nógu skært frá í sumar? Nógu skært frá erfiðum útileik sem vannst í byrjun júlí? Nógu skært frá 6-1 sigrinum í Smáranum fyrir tveimur vikum?
Eigum við að ræða sumarið 2021?
Agla María besti leikmaður tímabilsins
Tvær aðrar í liði ársins: Áslaug Munda sem er löngu farin í skóla og Karitas á bekknum, sem vermir varla mikið tréverkið í riðlakeppni Meistarakeppninnar.
Eigum við að ræða aukaþing KSÍ 2021?
Hilton Nordica, laugardaginn 2. október kl. 11:00.
Næsti formaður KSÍ, Vanda Sigurgeirsdóttir, á 109 mótsleiki að baki með Breiðabliki auk þess að starfa sem þjálfari hjá félaginu í mörg ár.
Eigum við að ræða UEFA Champions League 2021?
Klakksvík Færeyjum - Breiðablik 0:7
Gintra Litháen - Breiðablik 1:8
Osijek Króatíu - Breiðablik 1:1
Breiðablik - Osijek Króatíu 3:0
Skína ljósin nógu skært, stelpur, frá þessum sigrum? Var nógu gaman að spila á móti stelpum í búningum við sem við höfum aldrei séð? Var stuð að koma heim og hafa alla helvítis stúkuna með sér?
Eigum við að ræða þjálfaramál, félagaskiptamál eða ljósaperur í flóðljósum?
Stelpur í fótbolta eiga flestar rosalegum stuðningi að fagna. Sumar mæta mótlæti. Heima hjá sér, í fermingarveislum eða jafnvel í félaginu sínu. Þótt Breiðablik hafi líklega staðið sig klúbba best í að efla konur í boltanum hafa Breiðabliksstelpur mátt mæta allskonar sérkennilegheitum frá því Breiðablik var fundið upp. Árið í ár er ekkert nýtt.
Horfandi á þennan geggjaða árangur vaknar samt í hausnum á mér enn á ný spurningin um samanburð karlanna og kvennanna, og nú í nýju samhengi: Skína ljósin nógu skært?
Skína ljósin í okkur sjálfum nógu skært til að við metum framlagið og mergjaðan árangur þess að verðleikum?
Eiríkur Hjálmarsson