FRÉTTIR

Það er gaman að vera Bliki

02.08.2021

02.08 19:15

2021

Breiðablik

Víkingur

4:0

A-deild | 15. umferð - Stöð 2 Sport
Kópavogsvöllur | #

INTERNET (28)

Meðan ég var ungur, á árunum fyrir kristnitöku á Íslandi, háðu hinir fornu víkinga margar orrustur á eynni grænu, Írlandi, meðal annars á bökkum Liffey við Dublin. Þær fóru alla vega og leikir Breiðabliks og Víkinga í efstu deild hafa sömuleiðis farið alla vega og í raun algert jafnræði þar með liðunum; hvort lið með 32 sigra og jafnteflin voru orðin 21 fyrir leikinn í kvöld.
Í orrustu kvöldsins var ekki bara montréttur Fossvoxdalsins undir. Eftir snautlegt tap fyrir Keflavík var þess beðið í eftirvæntingu hvort Breiðablik ætlaði að taka þátt í keppninni um Íslandsmeistaratitilinn sumarið 2021 eða bara verða Evrópumeistarar.

Enginn senter!

Fyrri leiknum í sumar höfðum við grænir tapað stórt. Ein ástæða þess var að okkar danska nía hafði lítið í varnarstólpa Víkinga að gera í þeim leik. Þess vegna kom það ekkert rosalega á óvart að stormsentarar Breiðabliks, Thomas og Árni, byrjuðu báðir á bekknum. Nú átti að sækja á Víkinga með öðrum hætti og vonandi árangursmeiri hætti. Svona var byrjunarliðið:

Svikin um skrípó

Snemma leiks virtist þessi uppstilling ekkert vera að virka. Hápressa Víkinganna heppnaðist. Við gerðum mistök á vondum stöðum, fórum af kæruleysi í návígi, sendum boltann stundum í tvísýnu og losaralegar ákvarðanir sköpuðu gestunum fína sóknarstöðu hvað eftir annað. Þetta átti nú aldeilis eftir að breytast.

Kvikir Blikar – staðir stólpar

Stólparnir í vörn Víkinga hreyfast ekki mjög hratt og þegar við spilum upp á okkar kvikustu menn er ekki að sökum að spyrja. Þegar miðjumenn fara að berjast um hvern bolta og vinna hann hvað eftir annað eiga andstæðingarnir ekki von á góðu. Þegar vörnin og markvarslan á bak við er jafn fjári traust og fljót og yfirveguð og hún var í leiknum í kvöld, þá þarf að fara æfa sálumessur í Bústaðakirkju.

Jason Daði, sem var verðskuldað valinn maður leiksins í kvöld, framreiddi forréttinn eftir rúmlega hálftíma undirbúning. Það snotur afgreiðsla sem dró einmitt fram muninn á snerpu liðanna. Hann ákvað að við fengjum annan skammt af forréttinum því bara nokkrum mínútum síðar óð hann eins og elding á frákast frá aukaspyrnu Höskuldar og skoraði. Sú aukaspyrna fékkst eftir að miðjumennirnir okkar höfðu ákveðið að spila nær miðjumönnum Víkinga og nýta það að þeir eru fljótari. Jason er nú markahæstur Blika í sumar.

Jason Daði var verðskuldað valinn maður leiksins í kvöld.

Enn fleiri réttir á seðlinum

Það geta verið réttir á fleiru en getraunaseðlum. Með hálfleiksstöðuna 2-0 var bara haldið áfram að gera það sama en jafnvel ögn betur. Meira pressað á boltann, betri sendingar, meira sent í svæði en beint á menn með andstæðing í bakinu, hlaupið ennþá meira, mikið öryggi í vörninni og sú vinna skilaði sér. Í aðalrétt fengum við skallamark Viktors Arnar eftir horn. Það þarf snjallt plan til að fá leikmann jafn fagurfrían og Viktor var og hinir háu, biblíulegu saltstólpar í vörn Víkinga voru varnarlausir.

Viktor Örn (21) fagnar markinu.

Þeir voru það aftur skömmu síðar þegar eftirrétturinn var borinn fram á Kópavogsvelli. Eftir að hafa fengið mörk úr opnum leik, eftir aukaspyrnu og eftir horn var komið að stungusendingu. Damir og Jason Daði undirbjuggu nú hráefnið sem Gísli afgreiddi fagmannlega í netið. Þetta var orðin ákaflega vel samsett máltíð og komið að skemmtiatriðinu.

Gísli afgreiddi sendingu Jasons Daða fagmannlega í netið.

Blásið til sóknar

Ég veit ekki hvort það hefur verið gert áður að skipta báðum helstu senterum verðandi sigurliðs inn á Í EINU í stöðunni 4-0. Þetta sáum við á Kópavogsvellinum í kvöld. Sóttvarnarráðstafanirnar á vellinum gerðu það að verkum að ég sat með Copacabana á aðra hönd í stúkunni og heila stórfjölskyldu af Víkingum á hina. Þegar þessi skipting var gerð fór aðeins að fækka meðal Víkinganna. Það var svo snotur dólgur í henni. Áhrifin á leikinn sýndust mér helst þau að okkar menn héldu nú boltanum meira og lengur á vallarhelmingi Víkinga en á eigin vallarhelmingi við undirbúning sókna. Víkingunum í kringum mig fækkaði að minnsta kosti stöðugt hraðar það sem eftir lifði leiks.

Aftur í Evrópuboltann

Sigurinn í kvöld var kröftug yfirlýsing um hvað Breiðablikslið strákanna getur í fótbolta. Við höfum séð þær nokkrar upp á síðkastið þar sem rúllað er yfir hvert þýskumælandi liðið á fætur öðru – genau – og nú bíður Aberdeen. Fyrstu andstæðingar Breiðabliks í Sambandsdeildinni, Racing FC, búa við ármót Alzette og Pétrusse í Lúxemborg, Vínarbúarnir í Austria, sem slegnir voru út næstir, búa á Dónárbökkum og Víkingar Reykjavík við Fossvogslækinn.

Við bjóðum hvaða lið sem er, ekki síst Skotana af bökkum Dee, velkomið til leiks á bakka íslenskra lækja hvort sem spilað verður við Kópavogslækinn (sem hét svolítið óvirðulegra nafni þegar ég var ungur, þarna rétt fyrir kristnitöku) eða Laugalækinn, sem kenndur er við funheitar og sígrænar Þvottalaugarnar í Laugardal.

Eiríkur Hjálmarsson

Umfjallanir netmiðla

Myndaveisla í boði HVH og BlikarTV:

Mörkin úr leiknum:

Til baka