-
-
Þessar spiluðu sig inn í byrjunarliðið á móti Svíum.
Hrikalegt stolt af stelpunum
05.12.2020Þegar hið óvenjulega Íslandsmót var blásið af í haust var meistaraflokkur kvenna löngu búinn að sanna að þar fór besta lið sumarsins. Mögnuð mulningsvél sem ekkert mátti sín gegn. Þær virtust í betra formi en hin liðin, betur samæfðar, með betra upplegg og toppstykkin í svo góðu lagi að hikstarnir í mótshaldinu, skráveifurnar af veirunni og brottför stormsentersins í atvinnumennsku bitu ekki á þeim. Verðskuldað varð Breiðablik Íslandsmeistari kvenna í 18. sinn á 70 ára afmæli félagsins.
Rétt fyrir skyndileg endalok mótsins var samt ljóst að eitthvað myndi teygjast á boltasparki hjá nokkrum í liðinu. Þær voru búnar að standa sig svo stórvel að þær spiluðu sig þráðbeint inn í byrjunarlið landsliðs Íslands sem var í fínu færi að komast í úrslitakeppni EM á Englandi 2022. Þarna voru samt brekkur framundan fyrir landsliðið, ef ekki hamrar, sem þurfti að klífa og ákaflega skiljanlegt að landsliðsþjálfarinn leitaði í meistaraliðið eftir ferskum hæfileikum sem kæmu sér vel þegar fengist væri við síðustu og erfiðustu hjallana.
Fyrst Svíarnir svo Valur
Þegar síðasta leiknum sem Breiðablik spilaði á Íslandsmótinu lauk með afgerandi 0-1 sigri Breiðabliks á móti Val 3. október, höfðu þrjár verið í byrjunarliðinu tveimur vikum fyrr í mikilvægu jafntefli á móti Svíum hér heima. Þessar þrjár voru allar ófæddar þegar aldamótaárið gekk í garð – þær Sveindís, Alexandra og Karólína – en voru nú að byrja mikilvægan landsleik eins besta landsliðs heims á móti öðru sem er jafnvel enn hærra skrifað. Á bekknum var Agla María sem fæddist rétt fyrir aldamótin en þegar komin með 30 landsleiki og þar af nokkra í byrjunarliðinu.
Ég er þeirrar gerðar að mér finnst svakalega gaman þegar liðið mitt vinnur leiki en jafnvel enn yndislegra að sjá þegar ungt fólk blómstrar í sínu. Þarna var svo sannarlega dæmi um það og mér finnst þetta frábært dæmi um að félagið okkar stendur sig vel í að greiða ungu fólki leið að fjölinni þess. Það skiptir mig miklu, fyrir það er ég þakklátur og af því er ég stoltur.
Í þessum mikilvæga Svíaleik voru líka á bekknum hún Rakel sem ég tek hatt minn ofan fyrir og nánast höfuð í þökk nú þegar hún hefur sagt landsliðsferlinum lokið, Berglind Björg, þá nýfarin til Le Havre, og markmaðurinn Sonný Lára. Ég er reyndar þeirrar skoðunar að varnarvinna Breiðabliksliðsins í ár hafi haldið Sonný út úr byrjunarliði landsliðsins; þótt hún hafi varið vel þá hefur rosaleg varnarvinna Breiðabliks allt frá fremstu konu haldið henni nánast atvinnulausri milli stanganna. Það getur verið farsælla að vera markmaður í slöku varnarliði 😉
Rúmlega helmingurinn spilað með Breiðabliki
Þetta leiðir hugann að því hversu margar kvennanna sem tryggðu Íslandi þetta sæti á fjórða EM í röð (það er rétt að endurtaka þetta: á fjórða EM í röð!) hafa átt einhvern hluta síns ferils hjá Breiðabliki. Ef við lítum á landsleikina síðasta rúma árið, lokasprettinn að úrslitakeppni EM, og bara til þeirra sem komið hafa inn á í leikjunum þá lítur þetta svona út:
Af þeim sem voru inná í leikjunum frá ágúst 2019 til nóvember 2020 komu sjö úr Breiðabliki:
Svo má bæta við öðrum fimm sem hafa einhvern tíma spilað með okkur:
Það hafa 23 konur komið við sögu í leikjunum frá í ágúst í fyrra þannig að þessar tólf eru liðlega helmingur hópsins. Þá hafa þessar hérna verið hluti landsliðsins síðasta árið, tekið þátt í undirbúningnum og verið til taks á tréverkinu;
Andrea Rán Snæfeld Hauksdóttir
Steini og Óli
Þessi listi hér að ofan finnst mér sýna býsna vel að við stuðningsfólk Breiðabliks megum ekki bara vera stolt af frumkvöðlastarfi félagsins í kvennabolta eða fjölda stelpna sem eru að æfa eða fjölda Íslandsmeistaratitla í öllum aldursflokkum heldur eru Breiðablikskonur líka burðarás í ítrekuðum afrekum Íslands á alþjóðavettvangi. Svoleiðis gerist ekki sjálfkrafa. Það gerist með ræktarsemi, fagmennsku, dugnaði og virðingu allra þeirra sem að starfinu koma; sjálfboðaliðanna á Símamótinu, stjórnarfólksins í knattspyrnudeildinni, áhorfendanna á leikjunum, leikmannanna sjálfra auðvitað og þjálfaranna. Hann Steini á auðvitað heiður skilinn fyrir árangur Breiðabliks í sumar. Hann er einn heiðarlegu þjálfaranna sem talar hreint út og þarf þess vegna stundum að útskýra sig í löngu máli fyrir fáfróðum. Hér er ágætt dæmi um þegar hann tekur góðan tíma í að skýra hlutina. Og svo er hann Ólafur Pétursson, aðstoðarþjálfari meistaraflokks kvenna og markmannsþjálfari hjá körlunum. Hann hefur verið hjá okkur Blikum um árabil og er einn þeirra sem við sjáum í skýlinu þegar við horfum á hvern sigurleik kvennalandsliðs Íslands á fætur öðrum.
Stolt er góð tilfinning.
Takk stelpur!
Takk öll!
________________________________________________________________________________________________________________
Eiríkur Hjálmarsson
áhorfandi