Fagur Blikabolti á Evrópukvöldi
28.11.2025
Breiðablik
Fimmtudagurinn runnin upp og mikil spenna í loftinu hjá fjölskyldunni. Blikar í Evrópu. Blikar í Sambandsdeildinni. Upplifun sem er ekki sjálfgefin og nauðsynlegt að njóta. Eftir að fjölskyldan hafði komið saman og sporðrennt ljúfengum kjúklingavængjum var haldið á völlinn. Mætt var snemma því Jón Benedikt frændi ætlaði að vera fánaberi og boltastrákur á leiknum. Mikil upplifun fyrir hann. Á leið inn á völlinn lenti undirritaður í viðtali við mjög vingjarnlegan ungan mann frá frönsku sjónvarpsstöðinni Canal+ sem meðal annar bað um spá fyrir leikinn. Tvö-tvö sagði ég. Verður erfiður leikur og við þurfum smá heppni með okkur til að vinna en ég er viss um að við töpum ekki. Í desember mætum við svo Strasbourg og við ræddum þann leik einnig.
Svo var gengið til sæta í góðu en svölu veðri á Laugardalsvellinum. Við vorum það snemma að fámennt var og við horfðum því af áhuga á upphitun leikmanna og ljóst var að boltatæknin var ekkert að flækjast fyrir gestunum frá Tyrklandi. Ekki okkar mönnum heldur, þeir virtist í fantaformi í upphitun.
Stór hópur stuðningsmanna Samsunspor voru svo mættir í stúkuna hinum megin og rifu upp stemminguna fyrir leik. Það fóru hins vegar að renna á mig tvær grímur er nær dró leik og nær engin Blikar voru komnir á völlinn. Á tímabili fannst mér stefna í að það yrðu fleiri Víkingar, að fylgjast með Loga Tómasyni, á vellinum en Blikar. En allt í lagi þá er bara að öskra hærra. Það rættist reyndar aðeins úr þessu þegar nær dró leik en það verður að segjast að mæting stuðningamanna Breiðabliks á þennan stórleik gegn mjög góðu liði í risastórri keppni var bara frekar sorgleg. Ég er alltaf heiðarlegur og verð bara að segja þetta. Þetta var næstum eins og vera á útivelli. Það voru ríflega níu hundruð áhorfendur á leiknum og það er erfitt að segja en mín tilfinning á meðan á leiknum stóð var að Blikar hafi mögulega verið þar í minnihluta. En Kóbacabana var mætt og stóðu sig eins og hetjur. Hins vegar er það bara til skammar að lið sem er að ná eins góðum árangri i evrópukeppnum og Breiðablik geti ekki keppt á sínum eign heimavelli í Evrópu. Það er bara ekki boðlegt og eitthvað sem Kópavogsbær verður að skoða mjög vel hvort við Kópavogsbúar viljum virkilega hafa þetta svona, að við þurfum að fara út í sveit til að keppa okkar stærstu leiki. Hversu gaman hefði verið að keppa þennan leik á okkar eigin heimavelli, Kópavogsvelli?
En að leiknum. Hann fór mjög vel af stað og bæði lið virtust spræk og á tánum. Gaman að sjá Ágúst Orra á toppnum með sinn hraða, tækni og óþrjótandi baráttu. Enda tók það hann ekki langan tíma að plata króatann Toni Borevkovic, varnarmann Samsunspor, upp úr skónum á kantinum og renna boltanum fast og hnitmiðað fyrir á Davíð sem renndi honum fagmannlega í markið. Eitt núll eftir sex mínútur
Blikar héldu áfram að spila mjög vel og hafa greinilega haldið sér í mjög góðu leikformi síðan Íslandsmóti lauk. Viktor Karl vakti strax athygli mína, hann var eins og raketta á miðjunni og greinilega í fantaformi. Augljóst var samt strax að andstæðingarnir eru með frábært lið, enda búnir að vinna alla leiki hingað til í Sambandsdeildinni án þess að fá á sig mark, þannig að mjög mikilvægt var að halda fullkomnri einbeitingu. Á átjándu mínútu sendi Logi Tómasson boltann á hinn spræka framherja Samsunspor og landsliðsmann Chad, Marius Mouandilmadji, sem skaut á Anton sem varði en fékk boltann aftur og náði á setja hann í netið. Sem betur fer fór flaggið strax á loft. Hins vegar sást þarna vel hversu skæðir andstæðingarir voru.
Það var hins vegar alveg óþarft einbeitingarleysi sem gaf Samsunspor jöfnunarmark. Anton Logi átti alltof lausa sendingu á Viktor á miðjunni sem kongóísku landsliðmaðurinn Antoine Makoumbou komst inn í og sendi frábæran bolti á Marius Mouandilmadji sem lúrði frammi mjög klókur mitt á milli Viktor Arnars og Damir og renndi sér framhjá þeim og boltanum í netið. Klaufalegt mark að fá á sig en svona góð lið eins og Samsunspor refsa fyrir öll mistök.
Það sem eftir lifði hálfleiks voru Blikarnir bara mjög góðir og voru betri aðilinn í leiknum. Viktor Karl og Valgeir áttu hálffæri en staðan í hálfleik eitt-eitt.
Eftir gott kaffi og enn betra peppspjall við Kópacabana í hálfleik þá hófst leikurinn aftur. Hins vegar byrjuðu Blikar hálfpartinn á afturfótunum eftir hlé og Samsunspor virtist vera að taka völdin. Á fertugustu og níunda mínútu átti hinn fimi Maruius Mouandilmadji flott skot í vinkilinn. Á fimmtugustu og fimmtu mínútu skoraðu svo hann svo sitt annað mark. Aftur staðsetti hans sig mitt á milli Viktors Arnar og Damir og fékk frábæra stungusendingu inn fyrir sem hann kláraði af mikilli snilld. Frábær sóknarmaður sem erfitt er að eiga við. Blikar hresstust reyndar aftur við þetta áfall og börðust eins og ljón. Á sextugustu og fimmtu mínútu meiddist svo Valgeir. Það tók mjög langan tíma að gera skiptingu en þegar hún kom var hún þreföld. Andri Rafn, Gabríel Snær og Kristófer Ingi komu inn fyrir Valgeir, Aron Bjarna og Anton Loga sem allir höfðu staðið sig mjög vel. Það kom strax í ljós að gott var að fá ferska fætur og það liðu ekki margar mínútur þar til töframaðurinn Kristófer Ingi var búinn að skora eftir frábæran undirbúning Óla Vals sem verður að segjast að átti stórleik. Hann sýndi hvað hann hefur mikil gæði og tók þarna fjóra leikmenn Samsunspor í nefið áður en hann sendi hnitmiðaða sendingu á Kristófer sem kláraði af öryggi.
Það sem eftir lifði leiks var leikurinn æsispennandi og hnífjafn. Gestirnir átti skot í slánna en Blikar átti einnig sín færi til að taka sigurinn. Niðurstaðan varð samt 2-2 í frábærun fótboltaleik tveggja mjög skemmtilegra liða. Jón Benedikt frændi sem hafði haft það skemmtilega hlutverk að vera boltastrákur fyrir framan mjög fjöruga og vingjarnlega gestina var mjög ánægður með leikinn. Honum fannst Höskuldur bestur. Hann var frábær en það er bara staðreynd að allir Blikar spiluðu mjög vel í þessu leik. Ég get ekki gert upp á milli þeirra. Liðið kom til leiks tilbúið og mjög vel skipulegt. Vel gert Blikar.
-Úlfar Harri