Evrópuævintýrið heldur áfram á Kópavogsvelli á miðvikudaginn
11.11.2025
Það verður enn einn stórleikurinn hjá stelpunum okkar á miðvikudaginn þegar þær spila fyrri leikinn í 16 liða úrslitum Evrópubikarsins.
Andstæðingur okkar er lið Fortuna Hjorring í Danmörku. Þær urðu Danskir meistarar í fyrra en eru núna í öðru sæti á eftir Koge. Þær eru ennþá eina danska liðið sem hefur náð í úrslit í Evrópukeppni, karla eða kvenna en það gerðu þær árið 2003 og á leið sinni þangað mættu þær einmitt Breiðabliki og fór sá leikur 9-0.
Þau úrslit segja náttúrlega ekkert í dag, rúmum 20 árum síðar, á þessum tíma var danska deildin hærra skrifuð en hún er í dag og dönsku liðin yfirleitt að ná ágætum árangri í evrópukeppnum, þær hafa hins vegar setið svolítið eftir í þeim uppgangi sem hefur verið í kvennaknattspyrnu á undanförnum árum.
Ef við skoðum UEFA ranking á þessum liðum á síðasta tímabili þá er Fortuna númer 48 og Breiðablik númer 49. Það er því alveg ljóst að við eigum alveg möguleika á að stríða þeim í þessu einvígi, og það er nákvæmlega það sem við ætlum að gera.
Þetta verður erfiður leikur en við erum í séns á að komast áfram í átta liða úrslit sem væri frábær árangur en til þess að það gangi upp þurfa allir að leggjast á eitt. Þetta er síðasti heimaleikur Nik hjá okkur að sinni og það væri gaman að kveðja hann með góðum úrslitum.
Toppmæting í stúkuna er algert skilyrði eigi vel að fara, og hvetum við alla sem eiga þess nokkurn kost að mæta og öskra Áfram Breiðablik. Leikurinn hefst klukkan 18:00. Græna stofan opnar klukkutíma fyrir leik.
Áfram Breiðablik.
-B
