Pepsi MAX deild karla 2019: FH - Breiðablik frestað til mánudags kl.18:00!
22.08.2019Átjánda umferð Pepsi MAX deildar karla verður leikin um helgina. Við Blikar heimsækjum svart/hvíta FH-inga á Kaplakrikavöll kl.18:00 á mánudaginn í leik sem verður að teljast stórleikur umferðarinnar enda um að ræða innbyrðis leik liðanna sem eru í 2. og 3. sæti deildarinnar eftir 17 umferðir.
Það er mikið undir í þessum leik. Bæði lið eru í Evrópusæti eins og staðan er núna eftir 17 umferðir: Breiðablik er með 30 stig í 2. sæti og Fimleikafélagið með 28 stig í 3. sæti
Það er því mjög rík ástæða fyrir okkur Blika að fjölmenna í Krikann og hvetja okkar menn til sigurs gegn Hafnarfjarðarliðinu. Tvö síðustu ár höfum við unnið okkar leiki gegn FH í Krikanum - og gert 1:1 jafntefli 3 árin þar á undan. En jafntefli á sunnudaginn gerir lítið í baráttunni um að tryggja Evrópusætið.
Sagan
Breiðablik og FH eiga að baki 109 mótsleiki frá upphafi. Í öllum 109 skráðum leikjum liðanna frá 1964 til 2018 sigra Blikar 38 leiki, jafnteflin eru 21 og FH hefur sigur í 50 leikjum.
Fyrsti mótsleikurleikur liðanna var árið 1964 í A-riðli í 2. deildar. Leikurinn var jafnframt vígsluleikur Vallargerðisvallar og bæjarstjórinn Hjálmar Ólafsson tók upphafsspyrnu leiksins í tilefni dagsins. Dómari leiksins var Magnús Pétursson. Leiknum lauk með 1-1 jafntefli. Jón Ingi Ragnarsson skoraði mark Blika eftir flotta stoðsendingu Daða E. Jónssonar. Jón Ingi var svo aftur á ferðinni í fyrsta sigri Breiðabliks á FH í síðari deildarleik liðanna sem fram fór á Hvaleyrarholtsvelli 23. júlí 1964. Blikar vinna leikinn 2-3 með tveimur mörkum Jóns Inga Ragnarssonar og einu marki Grétars Kristjánssonar. Þriðji mótsleikur liðanna var einnig árið 1964. Sá leikur var í 2. umf Bikarkeppni KSÍ og fór fram fram á Hvaleyrarholtsvelli í Hafnarfirði. Leiknum lauk með 2-3 sigri Blika. Mörk Blika í þeim leik skoruðu Jón Ingi Ragnarsson, Júlíus Júlíusson og Sigmundur Eiríksson. Nánar um leiki liðanna árið 1964.
Það var mikið skorað í leikjum liðanna fyrstu 2 árin eða 27 mörk í 5 leikjum sem gaf tóninn fyrir framhaldið. Liðin hafa skorað að jafnaði 3+ mörk í yfir helming innbyrðis mótsleikjum liðanna frá upphafi.
Frá 1964 til 2000 hafa Blikar gott tak á FH. Í 60 mótsleikjum 1964-2000 sigra Blikar í 28 leikjum, jafnteflin eru 12 og FH hefur vinninginn í 20 viðureignum.
Efsta deild
Innbyrðis viðureignir liðanna í efstu deild eru 49. Leikurinn er því 50.viðureign liðanna í efstu deild frá upphafi. Breiðablik hefur unnið 20 leiki, FH 19 leiki en 10 sinnum hafa liðin skilið jöfn. Liðin hafa 24 sinnum mæst í efstu deild á Kaplakrikavelli og hafa Blikar unnið 9 leiki, FH 8 og sjö leikjum hefur lyktað með jafntefli. Blikar hafa skorað 75 mörk gegn 71 marki Fimleikafélagsins.
Í 24 innbyrðis leikjum liðanna í efstu deild á Kaplakrikavelli hafa Blikar vinninginn í 9 leikjum, FHingar í 8 leikjum og í 7 leikjum er jafnt. Meira>
2018. 1:3 Frábær sigur í Krikanum. Meira>
2017. 0:1 Íslenskt Já takk! Meira>
2016. 1:1 Jafnteflisbarningur í Krikanum. Meira>
2015. 1:1 Svekkjandi hársbreidd. Meira>
2014. 1:1 Flott stig í Firðinum. Meira>
Svona var stemmningin í Krikanum þegar við mættum þangað í maí 2018.
Leikmenn
Nokkrir núverandi leikmenn FH liðsins eiga rætur sínar að rekja til Breiðabliks. Vignir Jóhannesson, Guðmann Þórisson, Guðmundur Kristjánsson og Kristinn Steindórsson hafa allir spilað í grænu treyjunni.
Og fyrirliðinn okkar Gunnleifur Gunnleifsson lék 75 leiki með Fimleikafélaginu á 3ja ára tímabili frá 2010 til 2012.
Leikmannahópur Blika er mikið breyttur frá síðasta tímabili. Viktor Karl Einarsson kemur frá Varnamo í Svíðþjóð þar sem hann var á láni frá AZ Alkmaar. Þórir Guðjónsson kemur til okkar frá Fjölni. Kwame Quee kemur frá Víkingum í Ólafsvík en er svo lánaður til Reykjavíkur Víkinga í júlí-glugganum. Guðjón Pétur Lýðsson kemur frá KA. GPL10 lék í fyrra með Íslandsmeisturum Vals. Einnig er Thomas Mikkelsen með Blikum frá fyrsta mótsleik í ár. Thomas kom til okkar í júlí-glugganum í fyrra. Rétt fyrir mót ganga Höskuldur Gunnlaugsson og Arnar Sveinn Geirsson til liðs við Breiðablik. Höskuldur kemur á láni til okkar út keppnistímabilið frá Halmstads BK. Arnar Sveinn Geirsson kemur til okkar frá Íslandsmeisturum Vals og gerir tveggja ára samning við Breiðablik. Svo er Gísli Eyjólfsson kominn til baka eftir rúmlega hálfs árs dvöl á láni hjá sænska 1.deildarliðinu Mjallby. Þá er Aron Bjarnason farinn til ungverska úrvalsdeildarliðsins Újpest. Og Blikinn snjalli Kolbeinn Þórðarson hefur samið við belgíska 1. deildarliðið Lommel til þriggja ára. Og rétt fyrir gluggalok kvittaði Alfons Sampsted upp á lánssamning við Breiðablik frá Norrköping út keppnistímabilið 2019. Leikmannahópur Breiðabliks 2019
Sjáumst öll í Krikanum á sunnudaginn og hvetjum okkar menn til sigurs.
Leikurinn verður flautaður á kl.18:00!
Áfram Blikar, alltaf, alls staðar!
