• FRÉTTIR

Þróttur R - Breiðablik á Þróttarvelli þriðjudaginn 17. maí kl 19:15

Fyrsti leikur Breiðabliks gegn Þrótti R árið 1957 var jafnframt allra fyrsti opinberi knattspyrnuleikur Breiðabliks í landsmóti í knattspyrnu. Leikurinn fór fram á gamla Melavellinum í Reykjavík föstudaginn 7. júní árið 1957. Þróttarar unnu leikinn 1-0.

Þetta skrifuðu blöðin í júní 1957: „Í kvöld leikur nýtt utanbæjarlið hér sinn fyrsta leik, Ungmennafélagið Breiðablik í Kóapvogi leikur gegn Þrótti í 2, deildarkeppninni og hefst leikurinn kl. 20,30“ -og-  „Þeir sem léku fyrir Kópavog í fyrsta leik félags þaðan í landsmóti i knattspyrnu heita: Gunnlaugur Sigurgeirsson, Ármann J. Lárusson, Ingvi Guðmundsson, Baldur Sigurgeirsson, Hilmar Bjarnason, Þorsteinn Steingrímsson, Grétar Kristjánsson, Friðbjörn Guðmundsson, Magnús Tryggvason, Sigmundur Eiríksson og Árni Kristmundsson.“  Sjá nánari umfjöllun um leikinn og leikmennina.

Faðir Arnars Grétarsson þjálfara Blika, Grétar Kristjánsson, var í byrjunarliði Breiðabliks í fyrsta leiknum árið 1957. Grétar var góður framherji og skoraði 50 mörk í 113 leikjum með Breiðablik frá 1957 til 1968. Allir þrír synir Grétar spiluðu með Breiðabbliki. Jóhann Grétarsson 189 leikir 1978-1996, Sigurður Grétarsson 159 leikir frá 1979-1983 og 1998-2000 og Arnar Grétarsson 289 leikir 1988-1996 og 2006-2010. Samtals 750 leikir hjá þeim, 193 mörk eða tæp 4 mörk í leik að meðaltali. Geri aðrir betur! Enda er Grétar, ásamt tveimur sonum sínum, þeim Sigurði og Arnari, einn af 10 leikmönnum sem skorað hafa 50 eða fleiri mörk með Breiðabliki í opinberum leikjum frá upphafi.

Þegar Arnar Grétarsson mætir með liðið sitt á Þróttaravöll á þriðjudaginn verður það 52. sinn sem þessi lið mætast í opinberi keppni á þeim 59 árum sem liðin eru frá fyrsta leik liðanna í júní 1957. Skiptin eru nánast jöfn. Blikar hafa sigrað í 21 skipti, Þróttur 20 sinnum og jafnteflin eru 10. Deildarleikirnir eru 38; í B deild eru 24 leikir, 8 sigrar, 12 töp og 4 jafntefli; í A deild eru 14 leikir, 5 sigrar, 4 töp og 5 jafntefli. Smella hér til að fá upplýsingar um alla leiki og tölfræði liðanna frá upphafi.

Leikir Þróttar og Breiðabliks í gegnum tíðina hafa verið marka leikir eða 2.6 mörk að meðaltali í leik í öllum keppnum frá upphafi. Liðin hafa skorað 132 mörk í leikjunum 51 sem skiptast þannig að Þróttur hefur skorað 75 mörk en Blikar 57. Þarna telja árin 1957-1968 miklu máli því Breiðablik skorar á því tímabili aðeins 6 mörk gegn 27 mörkum Þróttar. Fyrstu sigrarnir á Þrótti komu ekki fyrr en B deildinni árið 1970 þegar við unnum Þrótt 5-1 á Vallargerðisvellinum og 2-3 á Melavellinum .

Þróttarar setja fram skemmtilegan vinkil í sínu kynningarefni (sjá mynd) og birta myndir af Eysteini Pétri Lárussyni, framkvæmdarstjóra knattspyrnudeildar Breiðabliks og fyrrverandi Leikmanni Þróttara, og Sigurði Hlíðari Rúnarssyni, verkefnastjóra hjá knattspyrnudeild Breiðabliks og fyrrverandi yngri flokka þjálfara hjá Þrótti.

Vonandi sjá flestir sér fært að mæta á Þróttarvöll í Laugardalnum og hvetja Blikaliðið til sigurs.

Kópacabana stuðningshópur Blika fjölmennir auðvitað.

Leikurinn hefst klukkan 19:15 þriðjudaginn 17. maí.

Áfram Blikar, alltaf, alls staðar!

-POA

Til baka