Kveðja frá Ungmennafélaginu Breiðabliki

26.11.2012

Fallinn er frá á 81. aldursári sá mikli garpur Ármann J. Lárusson, sem skipaði sér í flokk sem einn mesti afreksmaður íþróttasögunnar á Íslandi. Það afrek hans að vinna Íslandsglímuna alls 15 sinnum, þar af 14 sinnum í röð verður seint jafnað. Hann skilaði Grettisbeltinu ósigraður árið 1967 þegar hann hætti keppni.

Ármann hóf keppni undir merkjum Breiðabliks frá stofnun félagsins á sjötta áratug síðustu aldar. Þar sýndi hann fjölhæfni sína glögglega því undir merkjum Breiðabliks keppti hann í frjálsum íþróttum, handknattleik, knattspyrnu, bridge og síðast en ekki síst glímunni frá árinu 1961.

Fáir hafa tekið þátt í jafn mörgum landsmótum Ungmennafélags Íslands og Ármann. Hann keppti á sínu fyrsta móti árið 1949 og síðan á öllum landsmótum eftir það fram á allra síðustu ár og þá sem bridgespilari. Eftirminnilegasta landsmótið á ferli Ármanns fannst honum landsmótið á Sauðárkróki árið 1971. Þá skellti hann sér óvænt í glímugallann eftir að hafa ekki glímt í þrjú ár þar á undan. Varla þarf að taka það fram sérstaklega hver stóð uppi sem sigurvegari í þeirri keppni.

Ármann hefur alla tíð viljað veg félagsins sem mestann og hefur aldrei legið á liði sínu þegar til hans hefur verið leitað með hvað sem er. Þá var ekki setið við orðin tóm heldur verkin látin tala. Fyrir störf sín í þágu Breiðabliks hlaut Ármann æðstu heiðursveitingu félagsins á áttræðisafmæli sínu í mars síðastliðinn.

Fyrir nokkrum árum ákváðu þau hjónin, Ármann J Lárusson og Björg Árnadóttir að ánafna Breiðabliki verðlaunagripi og ýmsa muni sem Ármann hafði unnið til á löngum ferli. Félagið er stolt af því að varðveita þetta mikla safnog halda um leið á lofti minningu þessa mikla íþróttakappa og félagsmanns.

Ég votta eftirlifandi eiginkonu og afkomendum Ármanns samúð nú þegar hann hefur kvatt þennan heim.

Fyrir hönd Ungmennafélagsins Breiðabliks

Orri Hlöðversson, formaður.

Til baka